നിങ്ങളുടെ പ്രശ്നങ്ങൾക്ക്
ഭഗവദ്ഗീതയിൽ നിന്ന് ശാശ്വതമായ പരിഹാരം
അസുയയെ കൈകാര്യം ചെയ്യുന്ന വിധം
***********************************
ശ്രീമദ് ഭഗവദ് ഗീതാ യഥാരൂപം
അദ്ധ്യായം പതിനെട്ട് / ശ്ലോകം 71
*************************************************
ശ്രദ്ധാവാനനസൂയശ്ച ശ്രൃണുയാദപി യോ നരഃ
സോഽപി മുക്തഃ ശുഭാംല്ലോകാൻ പ്രാപ്നുയാത് പുണ്യ കർമണാം.
അസൂയ തീണ്ടാതേയും വിശ്വാസത്തോടുകൂടിയും ഇത് ശ്രദ്ധിക്കുന്നവൻ പാപപ്രതികരണങ്ങളിൽ നിന്ന് മുക്തനായി, പുണ്യാത്മാക്കൾ വാഴുന്ന ശുഭങ്ങളായ ലോകങ്ങളിൽ എത്തും.
ഈ അദ്ധ്യായത്തിലെ അറുപത്തിയേഴാമത്തെ ശ്ലോകത്തിൽ തന്നോട്സുയയുള്ളവർക്ക് ഭഗവദ്ഗീത ഉപദേശിക്കരുതെന്ന് ഭഗവാൻ വിലക്കിയിട്ടുണ്ട്. മറ്റൊരുതരത്തിൽ പറഞ്ഞാൽ ഭഗവദ്ഗീത ഭക്തന്മാർക്കുവേണ്ടി മാത്രമുള്ളതാണ്. എങ്കിലും, ചിലപ്പോൾ ഒരു ഭക്തൻ പൊതുവായ ഒരു പഠന ക്ലാസ്സ് ആരംഭിച്ചുവെന്ന് വരാം. അതിൽ പങ്കെടുക്കുന്ന വിദ്യാർത്ഥികളെല്ലാം ഭക്തന്മാരായെന്നു വരില്ല. അത്തരം തുറന്ന പഠനക്ലാസ്സുകൾ എന്തിന് നടത്തണം എന്നു ചോദിക്കാം. എല്ലാവരും ഭക്തന്മാരല്ലെങ്കിലും കൃഷ്ണനോട് ഈർഷ്യയില്ലാത്തവർ ഒട്ടേറെയുണ്ടാവാം. അവർക്ക് കൃഷ്ണൻ പരമപുരുഷനാണെന്ന വിശ്വാസമുണ്ടായിരിക്കും. അങ്ങനെയുള്ളവർ വിശ്വാസ്യനായ ഒരു ഭക്തനിൽ നിന്ന് ഭഗവദ്വചനങ്ങൾ കേൾക്കുന്നതോടെ പാപ്രപതികരണങ്ങളൊഴിഞ്ഞ് പുണ്യാത്മാക്കളുടെ വാസസ്ഥാനമായ ഗ്രഹവ്യൂഹത്തെ പ്രാപിക്കുന്നു. അങ്ങനെ ഒരു നല്ല ഭക്തനാകാൻ ശ്രമിക്കാത്തവർക്കുപോലും ഭഗവദ്ഗീതാശ്രവണംകൊണ്ടുമാത്രം പുണ്യകർമ്മങ്ങളിൽ നിന്നും നേടാവുന്ന ഫലം സിദ്ധിക്കും. സർവ്വപാപഫലങ്ങളിൽ നിന്നും വിമുക്തി നേടി ഭഗവത്ഭക്തരാവാൻ ഏവർക്കും അവസരം നൽകുകയാണ് ഗീതാപാരായണം കൊണ്ട് ഒരുത്തമഭക്തൻ ചെയ്യുന്നത്.
പാപ്രപതികരണങ്ങളിൽ നിന്ന് മുക്തരായ പുണ്യാത്മാക്കൾ എളുപ്പത്തിൽ കൃഷ്ണാവബോധം സ്വീകരിക്കാറുണ്ട്. പുണ്യകർമാണം എന്ന വാക്ക് ശ്രദ്ധേയമാണിവിടെ. വേദഗ്രന്ഥങ്ങളിൽ പറയുന്ന അശ്വമേധാദി യജ്ഞങ്ങളുടെ അനുഷ്ഠാനത്തെയാണ് ഈ വാക്ക് സൂചിപ്പിക്കുന്നത്. ഭഗവത് സേവനത്താൽ പുണ്യമാർജ്ജിച്ചുവെങ്കിലും പൂർണ്ണവിശുദ്ധി സിദ്ധിക്കാത്തവർ ധ്രുവ ലോകത്തെ പ്രാപിക്കും. മഹാഭക്തനായ ധ്രുവമഹാ രാജാവിന്റെ വാസസ്ഥലമായ ഈ ഗ്രഹത്തിന് 'ധുവ നക്ഷത്രം' എന്ന് പറയുന്നു.
Comments
Post a Comment